|
|
استكثرك وقتي عليّ وغدابك
عادة زماني كل ما طاب هوّن
ليت الذي وداك يا زين جابك
تشوف عقبك كيف الأيام سوّن
شرقٍ مشيت وغرب وقتي مشى بك
والقلب ماله لايمٍ فيك لو ون
عقب الهنا بك ذاق لوعة عذابك
تلونت دنياه ولا تلــــوّن
طويتني طي الورق في كتابك
حتى معاليق الحشا لك تطوّن
اشتقت لايام الهوى في جنابك
يوم الشموع بليل الاحباب ضوّن
واشتقت اقول لهاتفك مرحبا بك
واشتقت لغيوم الصحاري تكوّن
عوّد ترى داعي الهوى عند بابك
و اروي القلوب اللي بعد ما تروّن
غنيت لك يا عمري ولا جا جوابك
واسمي مع مجنون ليلى تدوّن